ភ្នំពេញ: ពិធីបិទវគ្គបណ្តុះបណ្តាលលើកទី២ ស្តីពី “ការសរសេរដំណឹងទាន់ហេតុការណ៍” នាថ្ងៃព្រហស្បតិ ១០រោច ខែស្រាពណ៍ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២៩ ខែសីហាឆ្នាំ២០២៤ សាលចតុម្មុខមង្គល ទីស្តីការក្រសួងព័ត៌មាន ក្រោមអធិបតីភាព
ឯកឧត្តម ជុំ កុសល រដ្ឋលេខាធិការ ក្រសួងព័ត៌មាន តំណាងដ៏ខ្ពង់ខ្ពស់ឯកឧត្ដម នេត្រ ភក្ត្រារដ្ឋមន្ត្រីក្រសួងព័ត៌មាន ក្នុង ពិធីបិទវគ្គបណ្តុះបណ្តាលជំនាញស្តីពី «ការសរសេរដំណឹងទាន់ហេតុការណ៍» ដែលរៀបចំឡើងដោយមណ្ឌលបណ្តុះ បណ្តាលវិជ្ជាជីវៈអ្នកសារព័ត៌មាន និងវិក្រឹត្យការ នៃក្រសួងព័ត៌មាន ដោយមានការអញ្ជើញចូលរួមពីអ្នកសារព័ត៌មាន និងអង្គភាពអ្នកនាំពាក្យរាជរដ្ឋាភិបាល និងអគ្គលេខាធិការដ្ឋានរដ្ឋសភា ប្រមាណជាង ៦០នាក់ បានចូលរួមវគ្គបណ្ដុះបណ្ដាលនេះ។
ក្នុងឱកាសនោះដែរ ឯ.ឧ ជុំ កុសល ក៏បានផ្តល់នូវអនុសាសន៍ល្អៗដួចជា : អ្នកសារព័ត៌មានគប្បីមុននឹងចេញផ្សាយ អត្ថបទរបស់ខ្លួនត្រូវត្រួតពិនិត្យលើអក្ខរាវិរុទ្ធឲ្យបានគ្រប់ជ្រុងជ្រោយចៀសវាងការសរសេរខុសនាំឲ្យ អ្នកអាន អ្នកមើលឬមហាជនខុសតាម ។ ឯ.ឧ បានបន្ថែមទៀតថាអ្នកសារព័ត៌មាន ត្រូវយល់ដឹង នូវពាក្យ ពេចន៍រាជស័ព្ទ នឹងពាក្យសង្ឃស័ព្ទផងដែរ។ ជាទីបញ្ចប់ឯ.ឧ ក៏ជូនពរដល់ ឯ.ឧ អស់លោក លោកស្រី និងសិក្ខាកាមទាំងអស់ឲ្យជួបតែសុខភាពល្អ។សូមបញ្ជាក់ថា ការបើកវគ្គបណ្តុះបណ្តាលជំនាញស្តីអំពី “ការសរសេរដំណឹងទាន់ហេតុការណ៍” នេះជាលើកទីពីរហើយ ដោយមានការផ្តួចផ្តើមរបស់ឯ.ឧ នេត្រ ភក្ត្រា រដ្ឋមន្ត្រីក្រសួងព័ត៌មាន៕
