កំពង់ធំ៖ កាលពីថ្ងៃអាទិត្យ ៩ រោច ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ត្រូវនឹងថ្ងៃទី៣០ ខែមិថុនា ឆ្នាំ២០២៤ អ្នកសារព័ត៌មាន ដែលជាសមាជិក សមាជិកា នៅក្នុងសមាគមសម្ព័ន្ធអ្នកសារព័ត៌មានប្រជាធិបតេយ្យ បានជួបពិភាក្សាគ្នា ចែករំលែកបទពិសោធន៍ពីគ្នាទៅវិញទៅមក ពង្រឹងក្រមសីលធម៌វិជ្ជាជីវៈអ្នកសារព័ត៌មាន និងការពារសិទ្ធិរបស់អ្នកសារព័ត៌មាននៅទីស្នាក់ការសមាគម ។ការជួបជុំពិភាក្សារបស់សមាគមអ្នកសារព័ត៌មានប្រជាធិបតេយ្យ បញ្ជាក់ថាបេសកកម្មរបស់សមាគម គឺផ្តោតលើការពង្រឹងតួនាទីសមាគមសារព័ត៌មាន ការតម្រង់ទិសក្រមសីលធម៌វិជ្ជាជីវៈអ្នកសារព័ត៌មាន ការប្រយុទ្ធប្រឆាំងព័ត៌មានក្លែងក្លាយនិងមនោគមន៍វិជ្ជា ការបើកវគ្គបណ្តុះបណ្តាល និងការអភិវឌ្ឍសមត្ថភាពអ្នកសារព័ត៌មាន ការការពារសិទ្ធិអ្នកសារព័ត៌មាន ការផ្លាស់ប្តូរបទពិសោធន៍ និងបំពេញឱ្យគ្នាទៅវិញទៅមកដោយឈរលើគោលការណ៍ស្ម័គ្រចិត្ត។អ្នកសារព័ត៌មាន ដែលជាសមាជិកសមាជិកានៅក្នុងសមាគមសម្ព័ន្ធអ្នកសារព័ត៌មានប្រជាធិបតេយ្យចំនួន ១៦រូប បានរួមគ្នាជាធ្លុងមួយ ដោយរួមទាំងចក្ខុវិស័យ និងសកម្មភាពការងារច្បាស់លាស់ ខណៈរំពឹងថានឹងអាចធ្វើការងារបន្ថែមជាមួយនឹងក្រុមហ៊ុន ហ្វីលីម៉រ ខេមបូឌា ចូលរួមទប់ស្កាត់ទៅធ្វើការខុសច្បាប់ និងចូលរួមជាមួយរាជរដ្ឋាភិបាលដើម្បីកាត់បន្ថយភាពក្រីក្ររបស់ប្រជាពលរដ្ឋខ្មែរ .។
លោក បណ្ឌិត គឹម សារឿន ប្រធានសមាគមសម្ព័ន្ធអ្នកសារព័ត៌មានប្រជាធិបតេយ្យ បានលើកឡើងថា ការរួមគ្នាបង្កើត សមាគមអ្នកសារព័ត៌មានជាច្រើនអង្គភាព គឺដោយសារតែកន្លងមកសមាគមទាំងអស់នោះ បានធ្វើការដាច់ដោយឡែកពីគ្នា ហើយមាន ការប្រកួតប្រជែងគ្នា ។
លោកបណ្ឌិត គឹម សារឿន បញ្ជាក់បន្ថែមថា៖ «ខ្ញុំចង់ឱ្យសង្គមល្អ ប៉ុន្តែយើងមិនអាចយល់គ្នាបាន ។ខ្ញុំយល់ថាអ្នកសារព័ត៌មាន បើសិនជាយើងសាមគ្គីគ្នា គោរពនូវក្រមសីលធម៌វិជ្ជាជីវៈបានត្រឹមត្រូវទាំងអស់គ្នា វាជាអាវុធមួយសម្រាប់ធ្វើសង្គ្រាមត្រជាក់ជាមួយនឹងបច្ចាមិត្តរបស់ជាតិ ។ ប៉ុន្តែរឿងខ្លះ ខ្ញុំឃើញតែ អ្នកសារព័ត៌មានមួយចំនួនតូចវាយប្រហារតែគ្នាឯង ដោយអួតអាងថា: ខ្លួនគ្រាន់បើជាងគេ ។ មានពេលខ្លះ តុលាការមិនទាន់វិនិច្ឆ័យថា ខុសឬ ត្រូវផងអ្នកសារព័ត៌មានគ្នាឯងដាក់មួយទំហឹងតែម្ដង ។ ខ្ញុំចង់និយាយថា អំណាចអ្នកសារព័ត៌មាន បានមកពីណា អ្នកណាជា អ្នកផ្ដល់អំណាចឲ្យយើង បើយើងអត់ចេះរួមគ្គ្នា បើយើងអត់ចេះជួយតម្រង់ទិសគ្នា»។
