សូម​ស្វាគមន៍​ សម្តេច ទ្រង់ ឯកឧត្តម លោកជំទាវ លោក លោកស្រី​ ចូលមកកាន់គេហទំព័រយើងខ្ញុំ !​ ទូរទស្សន៍​ ព្រះវិហារអនឡាញ​ផ្តល់ជូនព័ត៌មានថ្មីៗ ទាន់ហេតុការណ៍ ! សូមអរគុណ​!
0

អ្នកសារព័ត៌មានប្រមាណជា ១៧០០នាក់ ទាំងជាតិនិងបរទេស បានចុះឈ្មោះរួចជាស្រេចសម្រាប់ការយកព័ត៌មានក្នុងកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធដែលកម្ពុជាជាប្រធាន សម្រាប់ឆ្នាំ ២០២២

p007

ភ្នំពេញ​៖ អ្នកសារព័ត៌មាន​ប្រមាណ​ជា ១៧០០​នាក់ ទាំង​អ្នក​សារពត៌មាន​ជាតិ​និង​បរទេស បាន​ចុះឈ្មោះ​សម្រាប់​ការយក​ពត៌មាន​ក្នុង​កិច្ចប្រជុំ​កំពូល​អាស៊ាន និង​កិច្ចប្រជុំ​កំពូល​ពាក់ព័ន្ធ ដែល​កម្ពុជា​ជា​ប្រធាន នេះ​ជា​ការលើកឡើង​របស់ ឯកឧត្តម ផុស សុវណ្ណ រដ្ឋមន្ត្រី​ប្រតិភូ​អម​នាយករដ្ឋមន្ត្រី ទទួលបន្ទុក​ជា​អគ្គនាយក​នៃ​អគ្គនាយកដ្ឋាន​ព័ត៌មាន​និង​សោតទស្សន៍​នៃ​ក្រសួង​ព័ត៌មាន ។​ឯកឧត្តម មានប្រសាសន៍​បែប​នេះ ក្នុង​កម្មវិធី​ជំនួប​ជាមួយ​អ្នកសារព័ត៌មាន ស្តីពី ការត្រៀម​យក​ព័ត៌មាន​ស្តីពី កិច្ចប្រជុំ​កំពូល​អាស៊ាន និង​កិច្ចប្រជុំ​ពូ​ល​ពាក់ព័ន្ធ ដែល​កម្មវិធី​នេះ​រៀបចំ​ឡើង​នៅ​ភោជនីយដ្ឋាន​ទន្លេបាសាក់​២ ព្រមទាំង​មាន​ការអញ្ជើញ​ចូលរួម​ពី ឯកឧត្តម គង់ ភោគ រដ្ឋលេខាធិការ និង​ជា​អ្នកនាំពាក្យ ក្រសួងការបរទេស​និង​សហប្រតិបត្តិការ​អន្តរជាតិ លោក ពុយ គា អ្នកសារព័ត៌មាន​ជំនាញ​អាស៊ាន និង​ជា​ប្រធាន​អ្នក​ឆ្លងឆ្លើយ​ព័ត៌មាន​នៃ​ទីភ្នាក់ងារ​សារព័ត៌មាន​ជប៉ុន Kyodo លោក ប៉ែន បូ​ណា ប្រធាន​ក្លិប​អ្នកកាសែត​កម្ពុជា ព្រមទាំង​មាន​ការចូលរួម​ពី​អ្នកសារព័ត៌មាន​ដែល​អញ្ជើញ​មក​ពី​តាម​ស្ថាប័ន​និង​អង្គភាព​នី​មួយៗ​ជាច្រើនរូប​ទៀត​។​ឯកឧត្តម ផុស សុវណ្ណ បញ្ជាក់ថា អ្នកសារព័ត៌មាន​ប្រមាណ​ជា ១៧០០​នាក់ ទាំង​អ្នក​សារពត៌មាន​ជាតិ​និង​បរទេស បាន​ចុះឈ្មោះ​សម្រាប់​ការយក​ពត៌មាន​ក្នុង​កិច្ចប្រជុំ​កំពូល​អាស៊ាន និង​កិច្ចប្រជុំ​កំពូល​ពាក់ព័ន្ធ ក្នុងនោះ​អ្នកសារព័ត៌មាន​អន្តរជាតិ​មាន​ចំនួន​ប្រមាណ ៩០០ នាក់ ហើយ​ការចុះ​ឈ្មោះ​ត្រូវ​បាន​បិទ​បញ្ចប់​រួចរាល់​នៅ​ថ្ងៃ​ទី ៣១ ខែតុលា កន្លងទៅ ។ បើ​ប្រៀបធៀប​ទៅនឹង​កិច្ចប្រជុំ​រដ្ឋមន្ត្រីការបរទេស​អាស៊ាន​លើ​ក​ទី​៥៥ និង​កិច្ចប្រជុំ​ពាក់ព័ន្ធ ដែល​កម្ពុជា​ធ្វើជា​ម្ចាស់ផ្ទះ កាលពី​ថ្ងៃ​ទី​៣១ ខែ​កក្ដ​ដា ដល់​ថ្ងៃ​ទី​៥ ខែ​សីហា ឆ្នាំ​២០២២ កន្លងទៅ មាន​អ្នកសារព័ត៌មាន​ចំនួន​ជាង ៦០០ នាក់ ដោយ​ក្នុង​នោះ​អ្នកសារព័ត៌មាន​បរទេស​មាន​ចំនួន​ជាង ២៥០ នាក់​។​

​ឯកឧត្តម​បន្តថា ក្រសួង​ព័ត៌មាន បាន​សហការ​រៀបចំ​ជា​មណ្ឌល​ព័ត៌មាន (Media Center) មួយ​សម្រាប់​អ្នកសារព័ត៌មាន ដែល​មណ្ឌល​នេះ​បង្ក​ភាពងាយស្រួល​ដល់​អ្នកសារព័ត៌មាន​ដើម្បី​ទទួលបាន​នូវ​រូបភាព និង​វីដេអូ​មួយចំនួន ក៏ដូចជា​ឯកសារ​ពាក់ព័ន្ធ​ផ្សេងៗ​ព្រមទាំង​ការរៀបចំ​ធ្វើ​សន្និសីទ​សារព័ត៌មាន​ក្រោយ​កិច្ចប្រជុំ​ជា​ដើម​។​សូម​បញ្ជាក់​ជូន​ថា កិច្ចប្រជុំ​កំពូល​អាស៊ាន​លើ​ក​ទី​៤០ លើក​ទី​៤១ កិច្ចប្រជុំ​កំពូល​ពាក់ព័ន្ធ​ក្នុង​ក្របខ័ណ្ឌ​អាស៊ាន និង​កិច្ចសន្ទនា​អាស៊ាន​ជា​សាកល​លើក​ទី​២ នឹង​ប្រារព្ធ​ធ្វើ​រយៈពេល​៤​ថ្ងៃ នៅ​រាជធានី​ភ្នំពេញ ។​ព្រឹត្តិការណ៍​ថ្នាក់​កំពូល​នេះ នឹង​ប្រព្រឹត្តទៅ​ក្នុង​រយៈពេល​បួន​ថ្ងៃ​ចាប់ពី​ថ្ងៃ​ទី ១០ ដល់​ថ្ងៃ​ទី ១៣ ខែវិច្ឆិកា ឆ្នាំ ២០២២ រួមមាន​៖ កិច្ចប្រជុំ​កំពូល​អាស៊ាន​លើ​ក​ទី​៤០ និង​លើក​ទី​៤១ កិច្ចប្រជុំ​កំពូល​អាស៊ាន​-​ចិន លើក​ទី​២៥ កិច្ចប្រជុំ​កំពូល​អាស៊ាន​-​ជប៉ុន លើក​ទី​២៥ កិច្ចប្រជុំ​កំពូល​អាស៊ាន​-​សាធារណរដ្ឋ​កូរ៉េ លើក​ទី​២៣ កិច្ចប្រជុំ​កំពូល​អាស៊ាន​បូក​បី លើក​ទី​២៥ កិច្ចប្រជុំ​កំពូល​រំលឹក​ខួប​៣០​ឆ្នាំ នៃ​ទំនាក់ទំនង​ដៃគូ​សន្ទនា​អាស៊ាន​-​ឥណ្ឌា កិច្ចប្រជុំ​កំពូល​អាស៊ាន​-​សហរដ្ឋអាមេរិក លើក​ទី​១០ កិច្ចប្រជុំ​កំពូល​អាស៊ាន​-​អូស្ត្រាលី លើក​ទី​២ កិច្ចប្រជុំ​កំពូល​រំព្ញ​ក​ខួប​នៃ​ទំនាក់ទំនង​អាស៊ាន​-​កាណាដា កិច្ចប្រជុំ​កំពូល​អាស៊ាន​-​អង្គការសហប្រជាជាតិ និង​កិច្ចប្រជុំ​កំពូល​អាស៊ី​បូ​ព៌ា លើក​ទី​១៧៕ដោយ៖(យាយពេញ)p008

Filed in: ព័ត៌មានជាតិ

Leave a Reply

Submit Comment